卡卡、C朗個個都天價轉會，話邊個有錢邊個就可以喺足球界話事都唔過分。「錢」同「成功」始終未必畫上等號，不過就會出現弱隊愈弱呢啲唔平等嘅情況。NBA好在有薪酬上限，球員總人工一過咗上限就要畀100%奢侈稅，令大球會都唔敢亂增兵，好似今季總決賽隊伍湖人同魔術咁，識得用平價招攬有用球員，先係成功之道。

總決賽Game 5今朝8點開打，無論勝負如何，湖人同魔術呢個總決賽系列比起上季「黃、綠」大戰嚟講，的確輸蝕唔少。人人都話湖人有高比同加素，淨係講名氣同實力都贏晒魔術，不過只要諗真啲，湖人今季之所以有咁好成績，係有賴呢幾年嘅重建工夫，重召費沙，招攬阿利沙同重用拜林，呢三點都係湖人可以喺今季季後賽一帆風順嘅重要因素。但更重要係，湖人唔似皇馬用錢重建，而係用適合價錢，買入需要人才。

費沙阿利沙拜林超值

費沙、阿利沙同拜林三人年薪加埋約8,190萬港元，但比起高比拜仁約1億6,479萬年薪，足足少一半！佢三個去到季後賽合共平均有26.2分、9.9個籃板同5.1個助攻，試吓將佢乘二，用高比一半人工，就有超過高比一半功效，絕對稱得上超值。呢三個球員喺總決賽Game 4仲打出成季最重要一仗，阿利沙第3節入11分，費沙兩球致命三分同拜林內線獨力應付杜域侯活。呢一仗隨時值8,500萬港元（NBA總冠軍獎金）。

乜話？8,500萬？冇錯，贏一個總冠軍只係夠養高比拜仁半年。正因為咁，NBA球隊需要喺廣告、周邊產品同轉播費上面賺錢。但講到尾，冇成績點會有人鍾意你隊波，所以歸根究柢，用啱價買啱球員，又可以慳啲錢，又可以爭取好成績先係最重要。

全能陶告魯年薪排魔術第5

咁魔術呢？今季人工用咗5.8億港元，比上季用多接近1億，其中用6.2億同杜域侯活簽份5年合約有好大關係，為咗留住呢位主將，魔術願意每年支付過億人工，但今季睇到，常規賽喺禁區呼風喚雨嘅候活，嚟到總決賽暴露技術唔全面，心理質素唔夠嘅問題，所以魔術可以殺入總決賽，其他綠葉先至係功不可沒，其中最出色嘅，一定係陶告魯。喺04至05球季簽入陶告魯，6年約2億8,492萬港元，計番今年緊5,320萬，只係杜域侯活嘅一半，但今季就能以絕殺帶領魔術過關斬將。

陶告魯嚟到季後賽仲有樣貢獻，就係做埋策劃攻勢，艾斯頓得唔到雲根迪信任，尼爾遜又未有態，間接令陶告魯嚟到總決賽以4.9個助攻，成為陣中助攻王兼以1.41個偷波列隊中之冠。一個純射手改變到全能戰士，人工都係全隊排第5，連二打六中鋒Foyle都不如，下年唔想走就假，難怪雲根迪已經準備咗份過千萬美金合約，綁住呢位土耳其射手。

所以話要贏錦標，唔係使錢就得，而係要識使錢，湖人簽費沙、阿利沙同拜林有望重溫冠軍夢，魔術冇簽陶告魯，我諗總決賽都未必入得到。