儘管四年前已卸下甲一戰袍，但吳柱業跟「深愛」的籃球從未「分手」，轉以玩票心態繼續馳騁球場，聯同一班昔日隊友「打衞生波」，甚至出戰世界華人錦標賽，遊埠兼打波，落得逍遙快活，不過，「柱仔」寄語年輕後輩「要懂得未雨綢繆，先可享受快樂籃球」！
記：記者 柱：吳柱業
業餘波仲Enjoy……
記：幾年冇見，仲Keep得好Fit喎！
柱：梗係啦，我因為有做Gym同打網球Keep Fit，收山之後，一直打緊40歲以上組別嘅工商盃、市政盃，又代表「新青聯」去過美國、北京、上海打世界華人賽，仲贏埋冠軍添！比起以前喺甲一，依家打波完全冇壓力，Enjoy好多。唔怕話你聽，依然都仲有幾隊波「爭」緊我㗎，哈哈哈……
威立散班最失望……
記：喺20幾年甲一生涯入面，乜嘢令你最難忘同最失望？
柱：最難忘梗係97年威立喺印尼贏亞洲冠軍球會盃（上圖）啦，當時3個華將加兩隻鬼（外援），竟然贏到伊朗、日本、南韓等咁Top嘅球隊，真係發夢都冇諗過！至於最失望，就要數威立散班，事關隊波有成績，班隊友打得好開心，老闆（班主區啟光）又好……突然解散，點捨得呀？
磨定刀等教波……
記：你到依家仲咁熱愛籃球，其實有冇諗過做教練，傳授畀下一代？
柱：咁又冇噃！喺呢一刻，我仲係鍾意自己打多過教人（除咗個仔之外）。不過，我舊年都喺香港籃總考咗個教練牌，話唔定第日有機會用得着。
「柱仔」忠告……
記：作為老前輩，有咩忠告畀班年輕球員？
柱：唔好諗住齋打波或者教波維生，一定要搵份固定職業，識得為自己計劃未來，儲多個錢，咁你先有「條件」去Enjoy收山之後嘅生活。