常言道「少壯不努力、老大徒傷悲」，縱橫球壇多個年代仍屹立不倒的吳柱業，不諱言年紀愈大，就愈體會到這句說話的真諦：「冇錯，我本身唔係讀書材料，況且以前個社會要求冇咁高，唔使一定讀好多書都搵到食，嗰陣時自己好鍾意打籃球，又有得打甲一球隊咁威，於是中學未畢業就出嚟做嘢，專心打波……諗番轉頭，真係好傻！」
司職控球後衞的「柱仔」於1979年正式展開其甲一籃球人生路，先後効力過均安、思遠、威立、宏達及永倫等班霸，屢為球隊立下汗馬功勞，聯賽及銀牌錦標「多到數唔晒」，其中1997年更協助威立勇奪亞洲冠軍球會盃，寫下香港籃運歷史一頁。
「唔可以靠打波搵食」
當然，鍾意還鍾意，思想早熟的吳柱業亦深明「喺香港哋，點可以單靠打波搵飯食？一定要有份正職至有安全感，生活先得到保障。」離開校園後，「柱仔」曾從事地盤測量、酒廊主任，至1989年考入水務署搵到隻「鐵飯碗」，結果一做就20年，期間升過兩次職，由雜工捱到做監工。
鼓起勇氣41歲報夜校
運動有成、生活安穩兼有個幸福家庭，讓「柱仔」自豪滿足，惟「讀得書少」倒令他耿耿於懷，直到2005年結束甲一生涯，這位當時已年屆41歲的籃壇「長青樹」，終於「的起心肝」報讀夜校，進修英語、普通話及電腦課程。「丟低書包28年，成40歲人再做學生哥，真係要拎出好大勇氣！」「柱仔」感慨地說：「記得第一日返學，見到學校前面條大斜路，覺得好辛苦，唔係驚冇體力行上去會氣喘，而係心理壓力好大，擔心自己讀唔掂，又怕畀人笑『臨老抱佛腳』。」
不恥下問囡囡變導師
「打籃球叻唔代表乜嘢，就算喺球場度做到『博士』，但喺知識世界入面，自己實在太渺小！」吳柱業坦承：「最初一、兩個月真係諗過放棄，但時代不停進步，以前Office枱頭都唔會有部電腦啦，自我增值係必須嘅，所以我同自己講，既然決定咗（讀書）就要堅持，幾困難都要捱過去。」經過半年努力，「柱仔」克服了心理關口和學習障礙，更逐漸培養出閱讀興趣：「好多謝老婆同一對仔女嘅支持鼓勵，佢哋仲話鍾意我讀書多過打波添，有時啲功課唔識做，我都會向個女『求救』，唏，不恥下問嘛。」
自信提升中「讀癮」
過去四年來，學習生活從未間斷。吳柱業指出，重拾課本最大裨益，除加強與家人溝通外，還提升了交際能力和自信心：「知識豐富咗，做人處事都成熟啲，冇以前咁輕佻，連講句說話亦有層次好多。」「柱仔」還笑言已經中了好深「讀癮」：「就算將來唔再返學進修，我都一定Keep住睇書，唔會做隻井底之蛙嘅！」
吳柱業資多啲
年齡：45歲
職業：水務署監工
家庭狀況：妻、一子一女
加入甲一年份：79年（15歲）
收山年份：05年（41歲）
曾効力甲一球隊
‧均安（79-83）
‧思遠（83-95年）
‧威立（95-99年）
‧宏達（99-00年）
‧永倫（01-03、04-05年）
‧代表香港隊年份：79-93年
威水史
‧贏取多屆聯賽及銀牌錦標
‧曾代表思遠奪泰皇盃季軍
‧97年代表威立獲亞冠盃冠軍
‧98年當選甲一聯賽MVP
‧98年香港傑出運動員選舉最佳隊伍（威立）