高比拜仁同加素兩名主力走唔甩，為節省金錢，多數人都估計會從奧當同阿利沙中二選其一，減輕支出。兩個球員打法相近，連交出成績都相近，本應難以取捨，但原來阿利沙同高比仔Friend底，而且佢係高比仔練習拍檔，朝中有人好辦事，加上年紀比奧當細6年，進步空間大好多，所以留隊機會理應較大，就以三分球為例，阿利沙打3年魔術都未入過1球，但今年季後賽已經入咗38球，更成為湖人三分王！相反，奧當輸蝕在年紀大，雖然今季季後賽佢表現唔差，對火箭呢個系列賽仲負傷上陣帶畀球迷正面形象，但球隊睇長線嘅話，恐怕只好放棄佢。