「茅王」比杜斯甩難！NBA尋日宣布，唔會對上場惡意侵犯湖人中鋒加素嘅魔術後衞比杜斯秋後算帳，即係話呢位「茅王」可以喺聽朝舉行嘅第五回合賽事繼續上陣搏殺。

話說上場去到加時最後階段，魔術已經大勢已去，後衞比杜斯輸到發茅，喺加素入樽時，從後用雙手推佢，結果比杜斯被球證罰惡意犯規，事後好多人都覺得比杜斯會被罰停賽，不過聯盟睇番重播後，尋日決定唔對佢採取行動。至於今季年薪只得680萬美元（約5,320萬港元）嘅魔術後衞陶告魯，由於表現太過出色，外間指佢嚟緊暑假會選擇恢復自由身，搵一份高達1,000至1,200萬美元嘅長期合約，不過魔術表明會不惜付出奢侈稅，挽留呢位土耳其球星。

有兩單利好消息支持，魔術聽朝舉行嘅第5回合必定士氣大振，教練雲根迪亦自信可以創造奇迹擊敗湖人：「我哋唔會因為處境不利，就覺得冇機會攞總冠軍。」既然魔術咁有信心，聽日小讓3分上盤絕對博得過㗎！