尋日上演嘅NBA總決賽第三回合，魔術憑住神咁準嘅射波，以108:104擊敗湖人，取得歷史性勝利，其62.5%嘅命中率更打破NBA紀錄，喺總場數追貼1:2。聽朝魔術將會繼續喺主場對湖人，即管睇吓佢哋可唔可以乘勝追擊再下一城！

終止總決賽連敗

上兩場作客都輸波嘅魔術，尋日重返主場簡直脫胎換骨，個個射波都得心應手，半場已率先以75%嘅命中率，刷新NBA紀錄，到下半場佢哋手風依然順到冇人有，最終以62.5%命中率，打破91年公牛所創嘅61.7%，創出NBA總決賽命中率新高！

魔術全隊有五人得分達雙位數字，當中杜域侯活表現最好，取得21分同14個籃板嘅雙雙成績。魔術今場之所以打得咁落力，係因為NBA史上，88支落後0:3嘅球隊，未有一支可以後上勝出。賽後侯活話：「我哋已經輸咗兩場，但唔代表玩完！總決賽係打7場，我知湖人想直落四場KO我哋，不過我好清楚嚟緊三場喺主場比賽將會係我哋嘅世界。」

更值得高興嘅係，魔術終於成功終止總決賽連輸6場嘅紀錄，取得球隊喺總決賽史上首場勝利。至於湖人嗰邊，雖然高比射入31分，但佢喺下半場只射入10分，完場前更加有一次失誤，令湖人失去追平嘅機會，賽後高比話：「其實我哋今晚防守已經唔錯，奈何對手命中率仍然高達62%」

湖人輸埋呢場後，喺總決賽作客已經累積7連敗，追平活塞嘅紀錄。聽朝繼續作客魔術，形勢極之不妙，受讓3分都係捧番上盤好過！