本文重點
雖然NBA總決賽依家先打咗三場，冠軍誰屬仍係未知之數，不過今年夏天第一宗球員交易尋日已經正式誕生，費城76人成功以「籃板王」伊雲斯交換多倫多速龍嘅「三分王」卡邦奴，外間形容呢單交易將會係一個雙贏局面。
卡邦奴連續2屆3分王
現年29歲嘅伊雲斯，過去六季每48分鐘嘅籃板效率都打入聯盟前十，相信今次加盟速龍後，應該可以改善球隊最弱嘅防守，不過有美國傳媒指出，其實速龍簽入伊雲斯，背後目的係想騰出薪金，同時希望改善戰績，令一直希望喺2010年離隊嘅明星球員保殊可以回心轉意，續約速龍。
至於現年28歲嘅卡邦奴，來頭就比伊雲斯更勁，皆因佢係NBA兩屆三分王，職業生涯三分命中率更加高達45.4%，外間認為卡邦奴嘅加盟，將可以大大改善費城76人自從2007年將射手高華送去爵士後，外線能力一直不足嘅問題。