尋日上演嘅NBA總決賽Game2，魔術本有機會追平，可惜哥特尼李爾喺完場「拆你屋」失敗，最後湖人喺加時贏101:96。根據歷史，領先2:0嘅球隊，高達94.2%可以攞到總冠軍，湖人奪取史上第15座總冠軍形勢大好。

其實魔術今場發揮不俗，劉易斯喺第二節着晒火，全場更豪取34分。完場前一秒，魔術後衞陶告魯成功封走高比拜仁嘅射波，之後喺0.6秒交畀哥特尼李爾「拆你屋」，可惜後者唔生性射失，結果加時畀湖人嘅加素狂入7分，加上高比拜仁全場射入29分，最終再輸一仗。

高比仔全場射入29分，再一次展現王者本色。（美聯社圖片）

NBA季後賽周三賠率

魔術總決賽連輸6場

加素承認哥特尼李爾喺最後一刻射失係湖人贏波嘅關鍵：「當哥特尼李爾射失嗰球波，我成個人放心晒。嗰球本來可以摧毀我哋。但就因為佢射失，令成個形勢唔同晒。」湖人贏埋呢場後，依家喺總場數已經領先至2:0，根據歷史，以往喺首兩場主場贏波嘅球隊，勝出率高達94.2%，歷來只有三隊波可以成功反勝。

可憐魔術喺總決賽仍然未打開勝利之門，並連輸六場，僅次於巫師，成為NBA史上喺總決賽連續輸波第二長嘅球隊，不過考慮到魔術嚟緊將會連續3場喺主場比賽，為避免落後0:3，陷入萬劫不復嘅邊緣，聽朝主場對湖人可謂不容有失，小讓3.5分上盤博得過！