比杜斯Mark高比靠晒佐敦？魔術後備殺手比杜斯日前自爆係高比仔「粉絲」，之前仲着佢親筆簽名嘅戰靴搞掂勒邦占士，不過嚟到總決賽，比杜斯決定改穿米高佐敦戰靴，希望「波神」上身，KO偶像。

東岸決賽偶像上身贏占士

魔術後備殺手比杜斯，一直係高比拜仁球迷，高比仔為咗答謝比杜斯嘅支持，喺今年一月魔術作客湖人時，特別將一對自己親筆簽名嘅專用戰靴送畀比杜斯，自此比杜斯就着住偶像嘅戰靴征戰沙場，而且愈打愈好，季後賽東岸決賽更加帶領魔術擊敗勒邦占士嘅騎士，不過嚟到總決賽，比杜斯唔知係覺得着高比對鞋可能Mark唔番高比，定還係想博出位，講明會轉着米高佐敦系列其中一對較Old-School嘅款：「我已經將高比送畀我嗰對鞋擺喺屋企啦，嚟緊總決賽我會轉着米高佐敦嘅鞋。」

高比拜仁

「波神」戰靴

雖然比杜斯冇講佢會着佐敦邊一代鞋，不過佢承認要Mark高比將會係一件非常艱辛嘅工作：「我唯一可以做嘅，就係嘗試令佢喺第四節唔好攞咁多波，高比係一流嘅球員，基本上冇人可以Mark死佢，所以我諗我到時可能會同佢講：『喂！停呀，高比！唔好再跑啦，高比！』可能呢個係我令佢停低嘅唯一方法！」