一個球員要喺NBA取得成功，除咗先天嘅資質，後天嘅栽培亦非常重要！魔術中鋒杜域侯活嘅球技近兩年突飛猛進，除咗因為個人努力外，其實全賴「大猩猩」伊榮從旁指導，令佢「變種」成為真正嘅魔獸，真正名師出高徒。

九十年代同大衞羅賓遜、奧拉祖雲及奧尼爾並稱「四大中鋒」嘅伊榮，兩年前開始出任魔術嘅助教，並成為杜域侯活嘅師傅，結果只係用咗兩年時間，就令佢成為人見人怕嘅魔獸：「我覺得侯活係一位非常出色嘅球員，佢會耐心聆聽你想話畀佢聽嘅嘢，同時明白我所講嘅重點。過多兩至三年大家就會知佢可以進步到咩境界！」

勾手跳射進步神速

伊榮認為杜域侯活今年脫胎換骨：「侯活真係進步得好快，大家只要用佢上年嘅表現同今年比較，或者同之前幾年比較就會一清二楚。尤其係勾手。我記得初初嚟嘅時候同佢講過：『你成日都掛住入樽，但邊有可能次次進攻都有機會入樽呀？當對方推你出去嘅時候，你就要嘗試用勾手或者跳射嚟攞分。』」結果侯活聽到伊榮嘅勸告後，就立即苦練以上兩招，依家已經練到熟晒。

雖然杜域侯活喺今屆季後賽已累積五次技術犯規，不過伊榮認為佢控制脾氣比自己仲要好，至於有乜嘢勁過侯活，伊榮表示：「梗係射罰球啦！」未知侯活可唔可以完成伊榮球員時代嘅夢想，贏得總冠軍呢？