「囍點心」由五位老闆合資，除了上述三位球星之外，還包括前奧運腳朱偉霖和一位圈外人。雖然部分人有做老細經驗，但卻從未接觸過點心這一行。「套用行內人的說法，我們就是生手、外行人。問過一些酒樓朋友意見，知道我們連做侍應的經驗也沒有，結果惹來哄堂大笑。」不過文彼得仍堅信有得做：「所謂富貴險中求，經濟轉差，大家或者會買少件衫，但食東西的錢卻不能慳，而且我們的點心一籠才十多元，大家絕對花得起。」
見點心舖排長龍忽發奇想
不少圈中人都喜歡過一過老闆癮，但甚少會經營食肆，朱兆基解釋：「我和『(口靚)焜』平日練波後，很喜歡到宿舍附近一間點心舖開餐，眼見客人時常排長龍，想着想着，便建議不如自己也開一間，當為未來鋪路。後來知道Peter也想『搵啲嘢搞』，於是便一拍即合。」經過半年時間籌備，上星期四端午節當天，「囍點心」終於開張做生意。
除價錢實惠外，「囍點心」還有甚麼賣點？Peter搶先發言：「食點心最緊要夠熱，所以我們賣的都是即叫即蒸。」朱兆基接着補充：「用料要新鮮！」羅志焜再加一句：「要足料，幫襯過你就知。」三位老闆的三角短傳，將問題多多的記者打得落花流水。
足球員出身有助發展
眾所周知，朱兆基是澳門一間古着店的股東，Peter是屯門一間紙紮舖的太子爺，兩人今次再做老闆，坦言還要多多學習。初次下海的羅志焜則說：「自己完全無經驗，第一次接觸，很多地方都不知怎處理。」幸好眾人在球圈頗具名氣，對商界發展有一定幫助，Peter說：「幫助好大，很多人知道我們是足球員出身，甚麼都不知道，很樂意提供意見。特別是在附近開酒吧的尹敬良（愉園助教），他最明白我們的難處，幫了我們很多很多。」
羅志焜‧晨曦中場
喺晨曦踢咗都成九年，球會仲未搵我傾下季嘅事，我自己就有準備要轉換環境，去尋求新挑戰。我喺十一月二十四日就同女友Poffee結婚喇，老婆本已經儲咗喺度，不過仲未向佢正式求婚，梗係想搵多啲錢，起碼買番隻十卡鑽戒先似樣啦。
朱兆基‧晨曦中場
七年前如果唔係晨曦搵我，依家好可能已經冇踢波喇，所以真係好想多謝晨曦咁多位好老細。嚟緊呢季我已經係自由身，個心都想試吓新嘢。始終覺得自己仲有進步空間，話唔定可以喺足球事業再取得突破。
文彼得‧南華中場
南華仲有場亞協盃要踢，暫時未收得咧住。下一季就梗係希望港職聯搞得成啦！如果第日本地波有多啲宣傳，吸引到一啲大型贊助商，有多啲大水喉射住球會，對球員就肯定係好事，咁前途就一片光明。