本文重點
杜域侯活嘅「魔」幻奇緣繼續喺NBA上演！上一輪變走咗衞冕冠軍塞爾特人嘅魔術，尋日又將奪標大熱騎士趕出大舞台，以總場數四比二踢走對手贏得東岸冠軍。相隔十四年後再闖總決賽嘅魔術，嚟緊喺周五朝早就會展開同湖人嘅對決，季內兩度交手均凱旋而歸嘅魔術，自然備受期待。
夢幻決賽？睇歐聯就有！NBA？對唔住，想睇湖人高比拜仁火併騎士勒邦占士，明年請早啦！內外兼備嘅魔術喺尋日朝東岸決賽第六回合入面，憑住全體準繩嘅三分外投，加上中鋒杜域侯活個人獨得40分、14籃板同4助攻嘅完美演出，最後以103:90喺主場擊敗騎士，躋身總決賽。球迷仲喺比賽末段，當杜域侯活射罰球期間，高呼「MVP」同「打敗洛杉磯」添！
贏波功臣「超人」侯活表示：「過去幾年，所有人都講緊我哋有能力擊敗任何球隊，呢樣我知㗎！」至於教練雲根迪亦大讚隊員：「佢哋真係打得好努力，依家擊敗勒邦占士後，有機會迎戰高比拜仁，係我哋最大收穫。」
常規賽兩次交手贏晒
魔術對上一次殺入總決賽係1995年，當年佢哋慘被火箭四比○橫掃落敗，不過今次可能係另一回事，事關魔術喺今季常規賽兩次交手都贏湖人，唯一有所不同，係佢哋個控衞由養傷嘅尼爾遜換上艾斯頓，呢個亦會成為總決賽嘅勝負關鍵。