本文重點
單天難保至尊，即使強如「大帝」勒邦占士，亦唔能夠獨力帶領騎士贏得總冠軍。尋日朝不敵魔術被擯出局後，失落到爆嘅占士即刻戴上耳筒粒聲唔出，喺兩個保鏢護送之下經球員通道離場，就連賽後記者會都懶得去。
走上「波神」佐敦舊路，職業生涯頭六年始終未能奪標的占士，今仗表現只算平平，僅攞到今個系列賽個人最低嘅25分，雖然話都交出7個籃板同7個助攻，但喺隊友莫威廉士失準下，的確獨力難支。再加上內線薄弱等原因，難怪騎士未能再晉一級。
後衞吉遜表示：「所有人都受到傷害，睇住魔術每個三分波射入，等於將我哋個夢想粉碎。」更難接受係占士可能喺2010年回復自由身離開騎士，佢個冠軍夢有冇機會實現，真係難講！
騎士出局3大死因
內線衰薄弱‧伊高斯卡斯、華拿祖、賓華萊士同祖史密夫組成嘅內線，守強攻弱，兼且個別球員老化明顯，根本難擋魔術嘅杜域侯活。
進攻太單調‧以為搵到莫威廉士做好幫手，可惜去到關鍵時刻，勒邦占士都係要靠自己。咪見占士每場攞4、50分，查實佢係冇得揀。
心理質素差‧頭兩輪橫掃對手晉級，令騎士出現輕敵心理。嚟到最後階段，初嘗失敗嘅騎士一直處於迷失狀況，仲點贏波吖？