湖人粉碎金塊率先殺入總決賽!憑住「小飛俠」高比拜仁嘅超級表現,湖人尋日作客以119:92大勝金塊,總場數贏四比二,創會六十年嚟,第三十次稱霸西岸,即管睇吓嚟緊可唔可以乘勢攞埋第十五個總冠軍,重建「紫金王朝」!
安東尼過傷心生日
湖人高比仔尋日可以話打出職業生涯季後賽嘅代表作,攞到35分、6個籃板同10次助攻,成為米高佐敦後,史上第二位喺四屆季後賽以上,每屆至少射入500分嘅球員,加上好拍檔加素交出「雙雙」,攞到20分同12個籃板,最終帶領湖人以技術性擊倒金塊,連續兩屆殺入總決賽,亦係高比仔個人第六次。
事實上,今季能夠再次殺入總決賽,對湖人嚟講可謂別具意義,事關今年正正係湖人成立六十周年,第三十次稱霸西岸,若果之後喺總決賽擊敗對手,更加會係第十五次取得總冠軍。賽後高比表示:「上季我哋殺入總決賽,可惜未能奪標,我好希望今季可以做到。」
至於落敗嘅金塊,最傷心一定係攞到25分嘅安東尼,事關尋日正正係佢二十五歲生日,難怪賽後佢話:「呢份係一份極差嘅生日禮物。」湖人提早出線後,將會養精蓄銳,喺總決賽等待魔術或騎士嘅勝方,總決賽將會喺嚟緊禮拜五正式爆發!
近10屆西岸盟主
09年 湖人
08年 湖人
07年 馬刺
06年 小牛
05年 馬刺
04年 湖人
03年 馬刺
02年 湖人
01年 湖人
00年 湖人