騎士擒魔術追至2:3

雖然陷入出局邊緣，不過勒邦占士仍然唔認輸，仲喺尋日上演嘅NBA東岸決賽第五回合大發神威食出「大三元」，帶領騎士成功踏出絕地反擊第一步，主場以112:102輕取魔術，總場數追近至二比三。

為咗挽救「Match point」，尋日返番主場比賽嘅騎士，一開波就起勢搶，最多一度領先22分，魔術一度展現強勁嘅韌力，去到第三節反超前8分，不過騎士嘅勒邦占士去到第四節終極反擊，直接或間接包辦騎士所入嘅頭29分，完場前2分22秒，更令對方主將杜域侯活六犯離場，最後勒邦占士全場取得37分、14個籃板同12次助攻，職業生涯第四次喺季後賽攞到「大三元」，追平鄧肯，成為喺季後賽攞到「大三元」第二多嘅NBA現役球員，僅次傑特（11次），難怪隊友吉遜形容占士係外星人：「占士對比賽嘅專注同熱情程度，簡直超乎地球人。」

生死戰受讓唔怕追

其實騎士今場贏波，另一個關鍵係其餘球員成功幫占士分擔得分，有四人得分達兩位數字，當中莫威廉士更射入六個三分波，取得24分。

雖然騎士呢場贏波，但總場數仍然落後二比三，為咗成為NBA自1947年成立以嚟，第九支喺落後一比三下成功出線嘅球隊，騎士聽日絕地反擊第二步可以話不容有失，作客受讓1分照博！