本文重點
【本報訊】東岸決賽尋日上演第四回合，結果魔術破紀錄射入十七個三分波，加上杜域侯活取得「雙雙」，最後經過一次加時後，主場以116:114險勝騎士，總場數領先三比一，聽朝只要贏多場，就可以繼95年後，再次殺入NBA Finals。
總場數領先3:1
如果大家鍾意睇三分波，尋日睇魔術肯定過足癮，事關佢哋全場射三十八個三分波入咗十七個，命中率高達44.7%，打破球會喺季後賽紀錄。完場前四秒，魔術嘅劉易斯又射入三分反超前100:98，不過騎士嘅勒邦占士之後博到兩個罰球全中，追成100平手要打加時。
加時階段，魔術又輪到杜域侯活發威，個人獨取10分，全場攞到27分同14個籃板，最後令攞到44分嘅勒邦占士又再輸波收場，同時令自己喺今屆季後賽每場平均數據增加至20.4分同15.8個籃板，成為NBA近十五年嚟，繼奧尼爾同鄧肯後，喺季後賽打至少十場賽事，每場仍然有20+得分同15+籃板嘅球員。值得一提係，當年奧尼爾同鄧肯攞到呢項數據，最後都幫球隊攞NBA總冠軍，對杜域侯活可以話係好兆頭。
騎士總場數已經落後一比三，瀕臨出局邊緣，根據NBA紀錄，歷來喺季後賽落後一比三嘅球隊，只有八隊可以成功反勝，其餘一百八十二隊都出局，不過話晒騎士聽日返番主場比賽，相信可以贏番場吊命，讓8.5分上盤可以一試。