本文重點
1989年，米高佐敦喺首圈作客騎士嘅第五回合，完場前喺對方球員伊路面前入波，帶領公牛最後反勝101:100，總場數以三比二出線，賽後呢一個經典入球被命名為「The Shot」，至今仍然係騎士球迷心中嘅一條刺。不過騎士嘅勒邦占士，尋日卻重現「The Shot」，令一班鬱咗二十年嘅球迷獲得解脫。
Game 3作客魔術唔睇好
尋日騎士曾一度領先魔術23分，但喺完場前兩秒被魔術嘅陶告魯入波，落後93:95，不過騎士嘅勒邦占士，卻喺一秒後成功擺脫陶告魯射入三分波，令騎士反勝，全場20,562名球迷頓時陷入瘋狂狀態。事實上，勒邦占士除咗呢球外，尋日亦表現大勇獨取35分，令自己成為NBA季後賽自06年以嚟，射入「30+」最多場次嘅球員（27次），同時成為史上第三位，喺頭十場季後賽，至少取得300分、80個籃板同60次助攻嘅球員。
雖然騎士贏番一場後，總場數追平一比一，不過聽朝喺第三回合作客魔術，形勢卻唔多樂觀，事關從首兩回合所見，騎士根本抵擋唔到魔術嘅進攻，再加上騎士今季喺常規賽兩次作客魔術都輸波，其中一次更慘敗29分，格食格味濃，魔術讓4.5分，可以一試上盤。 文：白蘭芝