高比發威湖人險勝金塊

薑愈老愈辣！NBA西岸決賽尋日開打，雖然金塊嘅安東尼獨得39分，不過湖人嘅高比拜仁仲犀利，狂取40分，當中喺完場前6分48秒更加極速快擸15分，最後帶領湖人以105:103反勝金塊！

比立斯頭3個罰球全炒

由於湖人啱啱打足七回合先淘汰火箭晉級，外間普遍認為一早擊敗小牛出線、以逸待勞嘅金塊，可以喺首回合製造驚喜，果然金塊一開賽就佔到優勢，當中安東尼喺首節已經攞到全場39分中嘅16分，一度帶領金塊領先13分，不過湖人之後喺高比拜仁帶領下，慢慢攞番節奏，去到第四節，高比仔更加着晒火，喺完場前6分48秒狂取15分，最後帶領湖人反勝，連續十一場季後賽擊敗金塊，創出NBA史上連續擊敗同一支球隊嘅第二紀錄。

高比仔右手無名指甩臼

其實高比拜仁今場攞到40分實在難得，事關佢右手無名指喺比賽中再次甩臼！至於金塊今場輸波最大致命傷，完全因為射失太多罰球，半場射21個居然只係入得12個，比立斯頭三個罰球更加全炒，難怪教練卡爾勞氣：「我哋今日落敗，完全因為罰球命中率太低！」不過金塊尋日嘅表現，已經證明佢哋同湖人係有得打，所以聽日佢哋作客湖人受讓6.5分，絕對有力開多鋪下盤。