本文重點
雖然康宏晨曦同東方已經完成晒今季嘅甲組賽事，但係各位球迷如果想即場欣賞基奧雲尼、朱兆基、李健和同亞古沙等球星嘅精湛球技，都仲有機會喎！由香港奧委會及香港小型球總會聯合主辦、中銀香港慈善基金冠名贊助嘅「中國銀行（香港）第52屆體育節」小型足球表演項目，將會喺嚟緊星期六（5月23日）喺灣仔修頓球場，上演四場賽事，由下晝兩點踢到夜晚九點，各位球迷肯定過足癮！
新星明星球星齊齊獻技
星期六嘅表演項目將會上演四場波（見附表），打頭陣係一班足球新星，由港小總U11集訓隊對香港巴塞足球學校。第二場由晨曦明星足球隊對巴斯基邀請隊，晨曦喺幾名領隊周文亮、余錦基同洪祖杭率領下，一班主將如「阿叻」陳百祥、陳發枝、黃日華同梁漢文等，將會挑戰由「蠱惑仔」劉榮業領軍、陣中包括招重文、潘文俊、盛偉聯、鄧錦添、陳炳安等前甲組腳嘅巴斯基。之後第三場晨曦明星足球隊會同廣州女子足球隊較技。
到最後一場重頭戲，今季甲組聯賽盃盟主康宏晨曦，將迎戰今屆亞洲足協盃其中一支香港代表東方。康宏晨曦除咗朱兆基、劉志強同羅志焜等華將外，「森巴尖刀」基奧雲尼、「東瀛殺手」清野智秋、「黑色坦克」賓曹等外援球員都會上陣。至於東方代表人物李健和，由於已表明今季後將會掛靴，喺場上奔馳嘅機會將會買少見少，難得今次應邀參戰，各位球迷又點可以錯過呀?