快艇行運抽中「狀元籤」！NBA尋日為新一屆選秀次序抽籤，結果快艇爆冷中頭獎。被視為今屆狀元大熱嘅格芬知道後，立即表示對加盟該支洛杉磯球隊非常有興趣，睇嚟雙方好大機會一拍即合！
今季喺常規賽排包尾嘅帝王，本來有25%抽到狀元籤，而尾二嘅巫師則有17.8%抽到，不過只有17.7%嘅快艇，最後卻爆冷中獎，史上第三次有得揀狀元，對上兩位分別係1988年嘅曼寧同1998年嘅奧羅禾簡迪。賽前外間認為格芬將會成為今屆狀元大熱，抽到第一籤嘅快艇主席羅沙亦講明對格芬有興趣：「我哋會揀選最佳嘅新人，好多人都覺得係格芬，的確佢真係好勁！」
至於格芬就話：「我知道依家乜嘢都未有定案，但加盟快艇絕對係一個黃金機會。如果佢哋想要我，我一定會盡我所能。」既然兩情相悅，睇嚟快艇好大機會用狀元籤揀格芬。