本文重點
NBA東岸決賽將會喺聽朝正式爆發，騎士會先喺主場迎戰魔術。騎士喺今屆季後賽狀態大勇，連續以四比○橫掃活塞同鷹隊，好多人都認為同勒邦占士大勇有關，但有美國媒體最近卻爆料，指騎士幕後有一名總統奧巴馬嘅智囊分析數據，難怪奧巴馬都貼騎士會攞到總冠軍啦！
數據分析師身兼三職
據美國傳媒報道，原來騎士今季新增一位數據統計分析師，叫做丹羅森鮑姆（圓圖），呢位仁兄目前身兼三職，當中最把炮係喺奧巴馬上台後，成為美國預算同管理辦公室嘅高級顧問，主要工作係幫奧巴馬諗計應付當前嚴峻嘅經濟形勢，另外亦係北卡羅萊納大學格林波若分校嘅教授，至於最後一個Post，就係騎士嘅高級統計分析師。
消息指，丹羅森鮑姆好鍾意喺空閒時間用數據去分析球員，然後寫喺自己個Blog度，騎士嘅總經理丹尼費里就係睇咗丹羅森鮑姆個Blog，之後請佢擔任分析顧問。
奧巴馬撐騎士攞總冠軍
對於騎士嘅數據，丹羅森鮑姆開發咗一個調整後嘅場上影響值，即係統計該球員喺上陣後，所屬球隊嘅得分係多咗定少咗，不過丹羅森鮑姆仲考慮埋場上其他隊友以及對手嘅表現等情況，更加準確咁顯示球員對比賽嘅影響。
事實上，騎士多宗交易，都參考咗丹羅森鮑姆分析後嘅建議，例如賓華萊士仍然係對比賽影響最大嘅中鋒之一，而後衞韋斯就係最被低估嘅球員，結果佢哋依家都成為勒邦占士嘅得力助手，難怪總統奧巴馬日前貼騎士會喺總決賽擊敗湖人，奪取總冠軍啦！
勒邦占士
得分：32.9分
籃板：9.8個
助攻：6.8次
偷波：2次
封波：0.6次
杜域侯活
得分：19.6分
籃板：16.6個
助攻：1.3次
偷波：0.6次
封波：2.8次