本文重點
聽朝騎士對魔術，將會係應屆常規賽MVP勒邦占士同最佳防守球員杜域侯活攞獎後首次交鋒，堪稱最強對最強。由於騎士已經成個禮拜冇比賽，賽前勒邦占士發起戰鬥宣言，叫隊友立即振作，誓要延續連勝氣勢。
大帝發表戰鬥宣言
杜域侯活同勒邦占士今季喺常規賽鬥到難分難解，結果勒邦占士憑住全能嘅表現勇奪MVP，至於杜域侯活則靠恐怖嘅防守數據奪得最佳防守球員，勢估唔到兩人去到季後賽，多項數據都有提升，占士每場平均得分上升到32.9分，杜域侯活嘅籃板更加升到16.6個，究竟邊個可以喺聽日嘅首回合揚威？真係好睇臨場發揮！
由於騎士上輪一早以四比○橫掃鷹隊，相反魔術打足七場先淘汰塞爾特人，騎士足足比魔術多一個禮拜休息，好處係已經抖夠，但壞處係成個禮拜冇正式比賽，作戰狀態令人擔心，所以勒邦占士尋日向隊友發出戰鬥宣言：「大家快啲振作起嚟，出場比賽，擊敗對手！」