陶告魯榮登「籃壇張家輝」！一向喺場上表現沉實嘅「綠葉」陶告魯，尋日喺作客塞爾特人嘅生死戰擔正主角，終於憑住精湛嘅演出成功上位，帶領魔術以101:82變走衞冕總冠軍塞爾特人，總場數反勝四比三，自1996年後，再次進身東岸決賽。
早兩日我哋曾經為大家分析過兩場四強生死戰，可能會由四大綠葉主宰勝負，結果魔術嘅陶告魯一如我哋預測成功上位，全場十二投九中，取得25分同12次助攻，加上「魔獸」杜域侯活取得12分同16個籃板，最後作客以19分大勝塞爾特人，相隔十三年後，再次殺入東岸決賽，同時終結對手喺總場數領先三比二下，連續三十二次成功出線嘅走勢。
東岸決賽鬥騎士
魔術將會喺香港時間周四早上同騎士展開東岸決賽首回合，喺常規賽，魔術對騎士取得兩勝一負，不過騎士喺季後賽狀態大勇，先後以四比○橫掃活塞同鷹隊，而且早喺上個禮拜一已經開始休息，然而魔術主將杜域侯活仍堅信球隊可以打沉騎士：「我相信魔術有能力取得總冠軍，喺我哋未取得冠軍前，我哋絕對唔會停落嚟，因為我哋係一支完美嘅球隊，擁有好多有實力嘅球員，同時有一位好教練。」
綠軍3大致命死因
另方面，塞爾特人輸波，宣布衞冕失敗，賽後美國雜誌SI指出佢哋今屆三個死因，第一係加納特因傷提早收咧，第二就係季初有射手普斯同PJ布朗離隊，板櫈力量唔足夠，第三就係格連戴維斯同史卡拉賓年資太低，缺乏經驗，希望教練李華士嚟緊可以對症下藥，下季帶領「綠軍」捲土重來啦！