本文重點
雖然高比拜仁尋日對火箭又死火，好彩隊友加素及時發威救駕，取得「雙雙」佳績，帶領湖人主場以89:70拆散火箭，總場數贏四比三進身西岸決賽，不過賽後有傳媒大爆驚世數據，原來最近二十二年，冇一支喺季後賽贏過火箭嘅球隊可以攞到總冠軍，即管睇吓湖人今年可唔可以打破呢個魔咒！
明對金塊回唔切氣
湖人球星高比拜仁喺今屆季後賽表現飄忽，尋日佢又再次失靈，全場十二投僅四中，得14分，好彩隊友加素大發神威，個人獨取21分同18個籃板，一度帶領湖人拋離火箭31分，最後成功贏波，有驚無險連續第二年殺入西岸決賽。
不過有傳媒賽後卻發現，擊敗火箭原來係凶兆，自1986年起，但凡喺季後賽淘汰過火箭嘅球隊，冇一支可以攞到總冠軍，當中湖人就親身試過四次，真係邪到你唔信，最慘聽朝就要拿拿臨喺主場同金塊展開西岸決賽首回合賽事，邊有咁快回得切氣，都咪話冇隱憂，讓6.5分都係捧下盤為妙！ 文：真‧怒比利