美國《Real GM》最近評選季後賽表現最搶眼十名球星,結果塞爾特人後衞朗度同魔術「野獸」杜域侯活包辦頭兩名,睇嚟塞爾特人同魔術邊支可以喺今朝舉行嘅第七戰中贏出,好大機會睇以上兩人嘅發揮!(有線62及165、廣東體育周一早上8:00直播)
塞爾特人喺缺少加納特下殺入東岸四強,後衞朗度大爆發可以話係關鍵,呢位三年生喺今屆季後賽至今每場平均有17.4分、10個籃板同9.8次助攻嘅「準三雙」成績,令人刮目相看。
至於魔術嘅杜域侯活平均每場攞到20.3分、2.5次封波同16.6個籃板,緊隨朗度排第二位,即管睇吓佢今朝可唔可以憑內線嘅威力,擊敗由朗度領軍嘅塞爾特人,帶領魔術進身東岸決賽。
季後賽10大最搶眼球星
1.朗度(塞爾特人)
表現標青,喺「綠軍」缺少加納特嘅情況下,同雷阿倫及皮雅斯組成「新三巨頭」。
2.杜域侯活(魔術)
成功Keep住自己喺常規賽嘅表現,籃板更由常規賽嘅13.8個增加至16.6個。
3.勒邦占士(騎士)
騎士連續兩場橫掃對手嘅功臣,季後賽命中率由常規賽嘅48.9%增至52.2%,場均9.8個籃板,亦比常規賽多2.3個。
4.魯域斯基(小牛)
雖然被場外風波影響,但場上依然勇猛。無論命中率定籃板都比常規賽有顯著提升。
5.比立斯(金塊)
比立斯季後賽命中率高達54.1%。金塊能打出華麗進攻兼贏波,比立斯功不可沒。
6.柏堅斯(塞爾特人)
成功代替因傷提早收咧嘅加納特,場均高達2.7次封波。
7.高比拜仁(湖人)
真正表現出領袖本色係喺對火箭嘅第四回合。
8.加素(湖人)
喺季後賽嘅演出同常規賽基本上一樣,但成日炒罰球同犯規次數增加。
9.安東尼(金塊)
在季後賽中,仲有邊個比安東尼嘅得分能力仲好?
10.劉易斯(魔術)
喺魔術對76人嘅系列賽中,劉易斯嘅得分能力再次爆發,並用行動證明自己寶刀未老。