最近因為兒女私情，搞到失魂落魄嘅「德國槍」魯域斯基（右圖右），尋日終於打番爭氣波，喺得分大戰射贏安東尼，狂取44分同13個籃板，帶領小牛主場以119:117險勝金塊，總場數追成一比三，保持一絲出線希望。
魯域斯基最近因為女友泰萊被查出係「千面女飛賊」，情緒跌至谷底，好彩尋日終於醒覺，喺第四節大發神威，取得全場44分中嘅19分，射贏取得職業新高41分嘅安東尼，帶領小牛喺成功反勝，保持出線機會。
賽後魯域斯基非常激動：「我哋成場波基本上都落後，但最後居然後上反勝。我哋嚟緊一定會喺丹佛贏波，勢要創造奇迹！」老實講，金塊同小牛嘅實力其實唔差得太遠，既然魯域斯基重新搵番比賽嘅感覺，所以聽朝金塊主場讓小牛7.5分，下盤真係幾抵玩㗎。