本文重點
「占士法則」無可抵擋！雖然「大帝」勒邦占士尋日手風唔順，不過佢仍然憑住出色嘅防守，加上助隊友入波，帶領騎士作客以84:74擊敗鷹隊，繼上圈以四比○橫掃活塞後，再次以四比○勝出，騎士率先殺入東岸決賽，占士絕對係第一功臣！
究竟咩叫「占士法則」？等騎士教練米克布朗同大家講解吓：「當占士要波嘅時候，隊友就要將波畀佢，其他人都一定要讓路。」勒邦占士補充：「我係一個專門搵對手弱點進攻嘅人，如果對方防守好嚴密，我就會傳波，我相信隊友一定會射入。」
季後賽表現拍住名宿
「大帝」尋日就完美演繹呢條法則，由於自己手風唔順，全場射22球得9中入27分，於是專注防守同幫隊友，結果取得8個籃板同8次助攻，令隊友韋斯、莫威廉士同伊高斯卡斯得分達雙位數字，成為騎士贏波關鍵。
得益於「占士法則」，騎士依家已經將季後賽戰績改寫至八連勝，同時每場最少贏對手十分，延續呢項NBA新紀錄。歷史上，NBA只有1963年嘅奧斯卡羅拔臣，喺季後賽平均每場攞「30分+、9個籃板+、6次助攻+」佳績，但勒邦占士至今平均每場已經有32.9分、9.8個籃板同6.8次助攻，成為四十六年來第一位拍得住奧斯卡羅拔臣嘅球員！
騎士或有成個禮拜休息
由於另邊廂塞爾特人同魔術喺總場數打成二比二，睇個勢好大機會要七場先分到勝負，騎士隨時得到一個禮拜時間休息，對爭標形勢極之有利，即管睇下占士可唔可以繼續發威，帶領騎士封王啦！