「虎皮羊質」、「鳳毛雞膽」呢兩個成語，係形容有啲人外強中乾，睇嚟人稱「夢熊大師」嘅劉夢熊都係咁，喺荔枝角收押所僅僅過咗兩日鐵窗生涯之嘛，已經捱唔住氣息奄奄，畀人影到佢着住啡色囚衣，戴上氧氣罩，重兵護駕送院，認真係大陣仗呀，唔通真係獄中方一日，世間幾千年，真係難捱成咁？

其實夢熊大師向來都係多事之徒，有佢出現嘅地方唔慌唔會無風起浪，今次都唔例外。不過最令人笑爆嘴嘅係，佢老哥日前豪氣干雲引晚清「戊戌六君子」譚嗣同嘅絕命詩「我自橫刀向天笑，去留肝膽兩崑崙 」，懶係一身正氣、視死如歸咁款，點知一入監即刻嚇到病，有冇再窩囊啲呀？老老實實，你有冇見過譚嗣同押去刑場時會呻頭暈身㷫吖？你又有冇見過秋瑾要戴住個氧氣罩慷慨就義吖？

話時話，夢熊大師呢張氧氣罩相可謂曠古爍今，無出其右。冇錯，上氣唔接下氣嗰陣，吸氧氣係可以救命，但凡事有個限度，吸得多亦未必有益健康。再講啦，監倉未必有氧氣罐㗎，萬一抖唔到氣時又冇氧氣可吸，咁就大件事嘞。

有人質疑夢熊大師詐病，目的係爭取獄中較好嘅福利待遇。其實真病定詐病都好，大丈夫頂天立地，能屈能伸嘛，十八年後尚且係一條好漢，何況夢熊大師只係區區判囚十八個月，刑期七除八扣，明年今日咪又係一條大好狗熊囉，使乜下下咁多牢騷，搞咁多小動作吖。夢熊大師時不時吟誦毛主席詩詞，豈不知主席有句：牢騷太盛防腸斷，風物長宜放眼量。使乜咁「夢熊氣短」吖。

講到底，夢熊大師可能嫌獄中餐餐食雞翼，有翅飛唔走，太過百無聊賴啫。唔緊要，曹操也有知心友，淫賤黎不嬲對熊情有獨鍾嘅嘞，而夢熊大師亦樂於同佢眉來眼去，連判刑前都要專登接受壹淫媒爆料，話要大爆「政治炸彈」喎，結果政治炸彈就冇嘞，政治屁彈就差唔多，但點講都好，事實證明鷹犬同狗熊臭味相投，一條褲兩份着，咁啱KEY嘅老友，邊度搵呀。

嗱，反正淫賤黎因捲入黑金案被老廉調查多時，入冊只爭遲早嘅咋。趕得切嘅話，兩條麻甩佬歡度清明，一個拉二胡，一個高歌「人生於世上有幾個知己」，斷背都冇人理啦。之不過咁，「清明時節雨紛紛」，呢個時候陰氣較重，兩個都要好自為之呀，叮！