政壇：超選爭插旗 范國威自摑
過去一直反對俗稱「超級議席」嘅立法會區議會（二）功能界別嘅新民主同盟，雖然喺今屆區議會選舉取得足夠嘅超級議席提名票，但喺區選後仍堅持唔會參與功能界別選舉。該黨立法會議員范國威尋日突然轉軚，宣布喺三分之二黨員投票支持下，該黨會考慮喺九月立會選舉出戰超級議席，佢話會喺未來一個月落區諮詢選民意見，除咗超級議席外，亦考慮派人參選新界東、新界西、九龍東三區直選。
本身係白鴿黨前黨員嘅范國威等人，早年因白鴿黨支持一○年政改方案憤而退黨自立。對於佢哋急轉軚，召集人陳竟明指，佢哋當日退黨並非不滿政改方案，而係不滿當中嘅操作，包括白鴿黨參與密室談判。
范國威話唔係因本土民主前線梁天琦喺補選中報捷而作出上述決定，又未有評估選情，但承認喺新界東補選見到大量嘅本土抗議票，反映選民對本土嘅訴求，認為提出務實本土自治嘅新同盟會係激進本土同溫和泛民以外嘅另一選擇。佢又話新同盟十五個區議員都有機會參與超級議席，佢個人會積極考慮，但亦會評估留喺新東嘅可能性。
新同盟十五個區議員中，十四個嚟自新界東，佢哋話該黨要跳出新東，考慮派人到九龍東參選。大埔區議員任啟邦話九龍東公屋同中下階層較多，該區一直欠缺本土派選擇，認為可藉此跳出新東，亦不認同會鎅走其他泛民選票。
