政壇：楊岳橋「處男問」被窒
早幾日喺立法會新界東補選中勝出嘅公文袋楊岳橋尋日宣誓成為議員，當大會進行第二條口頭質詢時就已急不及待要貢獻佢嘅「第一次」，但佢嘅「處男問」就唔多暢順，可謂出師不利添！
楊岳橋處男提問唔單止被曾鈺成窒住，仲要被蘇錦樑寸爆。
楊岳橋尋日喺會上問及競爭事務委員會有冇實質時間表同路線圖進行檢討、同當局認為圍標問題係咪嚴重。商務及經濟發展局局長Greg蘇錦樑對呢個議會新丁大耍官腔，話競委會正做研究，又話如懷疑有犯法情況出現，就提交資料畀競委會調查。楊聽完即刻話「好驚訝」，但隨即被主席曾鈺成窒住，話唔可以喺呢度進行辯論。佢惟有改為再追問圍標問題係咪嚴重。但阿Greg都係「重播」之前嘅答案，仲寸嘴話有關問題係「非常簡單嘅知識」。
一入立法會佢唔止提問同發言，仲加入拉布行列要求響鐘點算法定人數。佢亦報名加入咗保安、司法及法律、發展、交通等最少四個事務委員會，直言「唔嘢少」。但今屆任期只剩低幾個月，若九月改選未能重返議會，咁就可以休息吓嘞！
