政壇：搞搞政：梁天琦辣火頭 峯鴿隔空反擊
本土民主前線梁天琦尋日出席電台節目批評白鴿黨，引起白鴿黨中西區區議員「峯鴿」許智峯致電到電台，批評佢扭曲事實。梁天琦被問到會唔會狙擊其他政黨，佢直言有可能狙擊白鴿黨，指一○年政改疤痕係彌補唔到，而白鴿黨今時今日仍未認錯，白鴿黨認為同中央溝通係正常不過，但佢就唔認同白鴿黨嘅做法，唔會覺得係盟友。
斥白鴿黨佔中僅打卡
梁天琦又話白鴿黨「高舉和理非非，但根本感召咗幾多人啫」，唔認為白鴿黨係真正嘅公民抗命者，「幾十年前瞓街嗰啲我唔講啦」，批評白鴿黨喺佔領行動時，「最尾嗰日出嚟打卡囉，大家坐晒喺度跟住等拉囉，但係喺之前嗰七十幾日呢？」佢話見唔到對方幾多次，即使有出現過，但當群眾上前質詢時又走咗，批評該黨唔係「知行合一」嘅從政者。
峯鴿就反駁指梁天琦嘅說話不符事實，佢話該黨由頭到尾參與佔領行動，自己曾兩次被捕，包括張賢登在內嘅多名糾察長，亦多次被捕，質疑點可以話該黨冇爭取，臨尾出嚟抽水？佢又話該黨睇到本土派抗爭路線係有支持者，雖然唔認同用暴力方法，唔協調都冇所謂，但如果大家嘅共同目標係反對尊權政制，點解唔可以停止互相攻擊，兩條腿走路去抗爭政府，呢啲都係市民嘅期望囉！
