政壇：林鄭面面不是人
民望近日再創新低嘅政務司司長林鄭月娥，早前以扶貧委員會主席身份出席退休保障公眾諮詢會，被市民鬧到一面屁，就算幾打得都好，佢尋日出席工商界活動時終於忍唔住公開吐苦水，自言政府處境不但「兩面不是人」，更加係「面面都不是人」，但佢依然死撐政府唔會討好任何人。佢講到面面不是人，但其實政府上任之初承諾研究標準工時、全民退保及撤銷強積金對沖，點知研究再研究，到任期就快完都係得個吉，被人批評歸根究柢就是議而不決，自招惡果。
話說林鄭尋日出席一個工商界退保研討會，透過英文發言大吐苦水，指早前在社工界的論壇上，官員被形容「冇良心」，漠視貧窮長者困境，佢就引述勞工及福利局局長張建宗曾自嘲處境係「兩面不是人」，但佢自言應該係「面面都不是人」。林鄭更拉埋張建宗、行政會議召集人林煥光落水，指大家都係由服務多年嘅公務員轉任問責官員，而公務員接受嘅訓練係唔會討好任何人，只會喺各方利益中尋求務實平衡，達致最大共同利益。
林鄭講就講得好聽，事實上政府搞到「面面都不是人」並非一朝一夕的事，先係政府早年打鑼打鼓話要解決退保問題，不但高規格搵扶貧委員會「揸莊」，仲隆重其事邀請學者周永新研究退保方案，點知搞完一場大龍鳳後，退保「降呢」變扶貧，政府幾千億元金庫未開，但就提早閂水喉拒絕向長者放水。
研標時辣㷫勞方
其餘競選承諾好似撤銷強積金對沖，年初施政報告仍然隻字不提，一味話持開放態度，而研究標準工時更加辣㷫勞方，至今仍然未肯重返談判桌。政府任期將屆滿，但民生政策拖足多年樣樣走數，唔知一眾問責官員有幾多個想競逐連任？不過單係睇林鄭嘅表現就似乎想「劈炮唔撈」，否則唔會講得出「官到無求膽自大」，大膽到將港人長遠利益推向大限，難怪基層、商界都要重錘出擊，「打」到林鄭面面都唔見得人嘞，所以話惡果自招，真的無講錯。
