無恥之徒見得多，未見過好似工黨立法會議員李卓人咁無恥，收取政治黑金不特止，醜聞曝光後仲要砌詞狡辯，簡直不知羞恥為何物！

立法會議員個人利益監察委員會日前發表壹傳媒前主席淫賤黎秘密捐款醜聞調查報告，雖然喺反對派議員包庇下，李卓人同社民連議員梁國雄被放生，但報告揭露李卓人收咗淫賤黎最少一百五十萬元秘密捐款，直到被傳媒踢爆，先至將本金轉入工黨戶口，唔止涉嫌違反申報法例，而且連利息都吞埋，引起社會嘩然。最離譜嘅係，佢仲死撐利息只係「好少嘅數」、「無關痛癢」、「唔需要回答公眾」喎。

咁都得？正如網民話齋，李卓人根本係狡辯，「袋住先」唔係合理解釋，早前解款車跌錢，執錢嘅市民都係「袋住先」，結果咪一樣有罪。更有網民指出，偷糖同偷金同樣犯法，隧道公司職員執一蚊，普通市民偷幾個橙，結果都惹上官非，李卓人以「好少嘅數」做擋箭牌，簡直係侮辱市民嘅智慧。

冇錯嘞，法律就係法律，貪一蚊都有罪，何況李卓人涉嫌私吞利息遠遠唔止一蚊，點到佢狡辯。法律界人士係咁講嘅，金額多少唔係關鍵，最重要係有冇從中得益，如果有就可能構成「公職人員行為失當」罪。今次李卓人吟詩都吟唔甩，佢唔同公眾交代唔緊要，將來慢慢同官講喇。

講開又講，李卓人醜聞多多，金主又點止得淫賤黎一個吖。職工盟多年來收取美國民主基金會轄下機構捐款一千三百幾萬元，而且每次「重大行動」都獲額外泵水，唔怪得有人甘心做洋走狗喇。所以話，香港淪落到今日嘅田地，唔係冇理由㗎，政局愈亂，政客愈有油水，唔搞到烏煙瘴氣至奇喇。李卓人厚顏無恥，擘大眼講大話，不如改名「李呃人」仲貼切喇！

所以話，政客靠得住，豬乸會上樹。反對派政客平日開口埋口爭取民主同公義，其實佢哋真正想爭取嘅係金錢同利益。立法會烏煙瘴氣，政客狼狽為奸，旨意佢哋查黑金，簡直嘥氣。講到底，要追查真相，清除禍根，始終要靠廉政公署嘅狗頭鍘，今次千祈唔好又令人失望吖。

當然喇，市民亦要盡一分力，明年係選舉年，大家知點做喇，就係運用手上選票，將牛鬼蛇神掃出門，還立法會一個清淨之地，叮！