李志堅與「堅家軍」的故事,由12年前香港青年軍開始。昔日學生哥逐一進身大港腳,由護級「升降機」變身成爭標分子香港飛馬,球隊名字轉變,人事更迭輪替,哪一天他們會飛的追夢信念,仍如若初見。「呢個世界總係有人認同,有人『葡萄』。」育苗成材背後,「堅Sir」歷盡風浪,「通過波仔」的心臟還頂得住:「大業未成,我哋需要再多啲肯定。」猶如港版《足球小將》,下一章節,仍在待續。

「我哋以前出外比賽瞓埋一張床!」操練過後,李志堅如像以往與弟子閒談說笑,只是昔日鬈曲長髮添上斑白,從南華外借回歸的羅港威亦不再稚氣。「以前成日覺得責任好大,人哋屋企交個仔畀你,用人生黃金時間踢波當職業,可大可小。」

師承郭家明投身香港青年軍教練,李志堅為小伙子定下逐步目標,從丙組踢上港超,師徒父子朋友情,一言難盡。「郭Sir較顧及球場以外事情,例如屋企有事會影響球員情緒,所以我會喺小時候管得多啲,又要為佢哋讀書保後路。現在仲有八成球員留喺球圈,算係實現其中一個目標。」

堅持畀小將多嘗試

「堅Sir」去季奪得最佳教練,「弟子」梁冠聰及陳肇鈞齊膺「最佳青年球員」,故事至此終結,本應是完美結局。只是人生往往考驗不斷,香港飛馬暫於聯賽落後,「堅Sir」笑對壓力:「全世界教練都係受力點。過去成績相對唔太重要,訓練時會多讓年輕球員嘗試唔同方法。現在需要平衡就難啦,但呢個係教練責任。」

通過波仔日服4粒藥

去年接受完「通波仔」手術,至今依然要日服4粒藥,「堅Sir」深信頂得住:「做生意更惡劣環境也試過,返大陸求人買貨千萬聲上落,又要等船期擔驚受怕,唔淨止炒魷咁簡單,真係會死人!」男人三十就身兼建築材料、時裝店及僱傭公司老闆,李志堅的人生上半場,本應是成功典範寫照,他卻偏偏「戇居居去咗教波」。老闆年代向印傭壓價凡事計盡;執起教鞭角色逆轉,事事都為小將的事上心,聯繫學校安撫家長,初上甲組首季便向深水埗要求球員最少月薪8000元,高於當年新丁「市價」。「講夢想都要食飯搭車。如果幾年後人哋仲係畀呢個價錢你,就證明你只係值咁多,唔好又要踢又要怨人工低。好在佢哋依家表現與態度,起碼見得人。」

人生沒有多少個10年,堅Sir直言難有心力孕育新一批幼苗,但仍未是時候功成身退:「球隊表現可以更穩定一點。我心目中有個時間表,當去到某個時候,應該畀佢哋走得更遠,衝出香港發展,呢個係終極目標。」