混血名模Jocelyn同老公Anthony以及Ankie貝安琪尋日齊齊為一個活動擔任嘉賓。Jocelyn話原本同老公會一如往年，返夏威夷同加拿大過聖誕、新年，兼探望家人，但今年因為買唔到機票，將會首次留港過聖誕，Jocelyn話：「我婆婆仲喺香港，我哋留喺度陪佢，不過佢遲都會返夏威夷。佢好鍾意香港，最唔捨得係啲美食，佢鍾意食點心、片皮鴨同海鮮，喺夏威夷佢食唔到呢啲美食，今次係佢人生第一次食。上星期我哋去咗長洲食海鮮，佢好開心，最鍾意食我都最鍾意嘅蒜蓉蒸扇貝，我好想學煮，咁返到夏威夷，就可以煮畀佢哋食。」

Ankie（左起）、Anthony同Jocelyn做活動嘉賓。

而Ankie被問到有冇試過喺聖誕向男生表白，佢話：「無喎，亦都無男仔喺聖誕節或者其他節日向我表白。」咁你會唔會主動表白？佢竟然話：「好細個時試過，嗰時我七歲，寫情信畀男仔，畀人拒絕咗。」

第一手消息請下載on.cc東網iPhone/iPad/Android/Windows Phone Apps