政壇：搞搞政：立會世襲議席 富貴黨遇勁敵
立法會批發及零售界議席，多年嚟都係富貴黨嘅囊中物，該界別議員方剛自○四年當選後，一做就是三屆，盛傳佢下屆想退下火線，有意交棒畀該黨副主席邵家輝。但有業界並唔認同該黨將議席當為私產，界內早已有人放風，指如果方剛放棄連任，就會爭奪議席，隨時爭崩頭。目前有傳「假髮大王」趙振國有意捲土重來，而裕華國貨董事總經理余鵬春亦或會出選，而余鵬春更被視為最大嘅勁敵。
有業界人士分析，富貴黨喺批發及零售界坐擁約二千票，佔整個界別約三分一票源，而趙振國喺○八年選舉只得一千多票，差距一半，非常難追。但該黨喺批發及零售界嘅地位並非牢不可破，關鍵係余鵬春係咪出選，相信憑藉佢嘅業界地位，先有望「界」走該黨嘅票源，甚至有機會勝出議席。
會否改選商界成關鍵
不過，早前已有傳香港總商會嘅立會代表林健鋒因政改「甩轆」，下屆可能無得留低，而余鵬春係其中一個潛在候選人，如果余出選商界，自然無法出戰批發及零售界，邵家輝就能順利「繼承」議席。雖然有傳余鵬春最近好少出席批發及零售界活動，但距離立會選舉仲有一段時間，加上有指余鵬春係林健鋒嘅朋友，未必會出戰爭位，所以邵家輝能否順利接班，仍存在未知之數。
