喺上周六立法會發生駭人聽聞嘅枱底藏「屎」案，會計界議員Kenneth梁繼昌揩到成褲都係啡色物體。事隔一星期，化驗結果終於出爐，證實佢褲管上嘅係脲甲醛樹脂（Urea Formaldehyde），即係用於黏合木材嘅聚合樹脂。雖然虛驚一場，但就衍生一宗無頭公案，事關秘書處早前已翻查閉路電視錄影帶，並未發現任何可疑情況；業界亦指喺無工程嘅情況下，唔會無故滲漏出脲甲醛樹脂，所以事件仍有疑團未解。

立法會主席曾鈺成尋日下午交代化驗結果，佢話先後將樣本送往私人化驗所同政府化驗所，結果顯示係排泄物嘅可能性好低，因為種唔到腸內所含嘅細菌，但就驗出含脲甲醛樹脂；而該會議室另一座位嘅相應位置，亦發現類似啡色物質。佢又提到立法會職員檢取樣本時，曾經用酒精抹過，可能會影響種菌結果，但政府化驗所並無發現排泄物氣味。

樹脂溶解 原因未明

雖然化驗結果顯示係脲甲醛樹脂，又無發現排泄物氣味，咁Kenneth當日話聞到便味，豈不是做戲？但Kenneth仍然一口咬定聞到糞便味道，又話當日用酒精紙巾抹得好乾淨，反指驗到有細菌先出奇。唔知係咪面子問題，Kenneth話自己十年前經常同仔女換屎片、尿片，沾到糞便對佢嚟講好平常，但承認今次係無頭公案。

多名裝修業人士都話，樹脂乾透後，一般好難溶解，無可能會揩到成條褲都係，加上立法會大樓落成多年，無可能會未乾，亦無可能會發出臭味。其實，呢幾日有啲議員特登戴口罩開會，話立法會好多菌，以免中招，本來以為化驗報告可以解開謎團，點知又衍生出另一個謎團，唔知議員日後坐喺會議室開會時，會唔會更加心慌慌呢？

第一手消息請下載on.cc東網iPhone/iPad/Android/Windows Phone Apps