資助房政策混亂 市建局煥然跪低

好似市建局推出首個資助房屋「煥然壹居」咁吖，本來係一件好事，可惜爆出濫用公帑益「單身貴族」嘅爭議，引起滿城風雨。市建局眼見群情洶湧，被迫跪低，將單身申請人入息上限由原先六萬元調低至三萬三千五百元，資產上限由三百萬元減半至一百五十萬元，即係話單身人士只可負擔約四十個單位。最好笑嘅係，市建局以今日嘅我打倒昨日嘅我，仲好意思話係一場誤會，行政總監林濬甚至賴今次事件係「政治污染」添，簡直係死雞撐飯蓋。

正所謂，面係人哋畀，架係自己丟，市建局搞出個大頭佛，完全係咎由自取，與人無尤。呢個項目話明係資助房屋，本來應該優先照顧最有需要嘅家庭，尤其係嗰啲冇資格申請公屋又買唔起私樓嘅夾心階層，點知市建局冇嗰樣整嗰樣，大玩平均主義，將月入六萬元嘅單身人士納入其中，申請資格一樣，明顯違背資助房屋初衷，搞到好事變壞事，咁唔係添煩添亂又係乜。

老實講吖，香港房屋問題不斷惡化，煥然壹居只有三百幾個單位，根本係杯水車薪，唔理市建局點樣調整申請門檻，都係無補於事。係人都知，公屋輪候人數不斷飆升，申請者就快衝破三十萬大關，距離三年上樓目標愈來愈遙遠，一般家庭固然望樓興嘆，年輕單身人士更加閉翳，連當局都承認從未有三十歲以下嘅申請人獲配公屋。尤其係新計分制下，十八歲開始申請公屋，隨時要等三十年至有機會上樓，都咪話唔誇張。

冇計喇，今日社會泛政治化，有人郁吓就反對，郁吓就提司法覆核，搞到港府綁手綁腳，寸步難行，就算想增加房屋供應都有心無力喇。市建局參與興建資助房屋，本來可以為解決房屋問題出一分力，提供多一個選擇，可惜出師不利，第一個資助項目就搞到爭議多多，都唔知好笑定好嬲。

所以話，港府吹水唔抹嘴，成日話民生無小事，又話要關懷年輕人，點知到頭來又係大隻講。正如有人話齋，房屋問題唔止係民生問題，而且係社會問題及政治問題，無殼蝸牛連安居之所都成為遙不可及嘅夢想，香港想有運行都幾難喇，叮！