城中鏡：議員「針」慌慌
進入冬季流感高峰期，食物及衞生局局長高永文尋日到立法會邀議員接種季節性流感疫苗，兼鼓勵市民打針預防流感。有議員叫本身係骨科醫生嘅高永文幫佢哋打針，原本腼腆推搪嘅高永文最後難抵一時技癢，幫「田二少」田北辰同「大舊」陳偉業打針。打針一刻班議員呱呱叫，七情上面扮晒痛，演技咁好，唔做演員真係嘥晒。
陳恒鑌打流感針七情上面，仲作狀痛到要咬高永文。
陳肇始（右）親自幫吳亮星摺起恤衫衫袖。
張宇人第一個打流感針，一摺起衫袖就被陳偉業「鍊」手臂。
自言三年半冇幫過人打針嘅高醫生話，自己好少打流感呢啲肌肉注射針，相信護士手勢會好啲。但佢最尾都係忍唔住手，幫咗田二少同大舊打針。成日「拉布」嘅大舊仲講笑話，高醫生係咪玩「王子復仇記」，搵支大支啲嘅針幫佢打，等佢打完冇得「拉布」喎。
陳恒鑌「咬」高永文
其他議員打針時都好搞笑，好似陳克勤同陳恒鑌咁，護士同佢哋打針時，一個就呻話支針大支，擰轉面；另一個就扮到好似好痛苦咁，仲捉實高醫生隻手，作狀咬落去，七情上面。不過，唔知佢哋係咪怕護士姐姐嬲嬲豬，所以之後都讚護士姐姐手勢好，一啲都唔痛喎。議員陳志全打針時就除咗件外衣，剩低件小背心，非常「性感」，即時全場起哄。但佢就不慎凸點，高醫生即刻攞塊宣傳牌遮住。
全體七十名議員中，只得二十幾位打針，阿Ann蔣麗芸喺高醫生同食衞局副局長陳肇始三催四請下都唔肯打，佢開頭就解釋話唔想浪費資源，留番畀有需要嘅人，之後又話其實自細已經怕打針，究竟邊句先真呢？
