SUN揭秘：大埔友共乘 滿載街坊情
80後創業青年呂忠義Albert，早前在社交網站開設「大埔街坊泥鯭」群組，讓街坊在網上相約義務車主「搭順風車」。群組簡介：「友共乘，有共情，我哋追求快樂共乘！」群組出現不單掀起嶄新的交通模式風潮，更打破了鄰里間的隔膜，讓人與人之間重新連結。「有人唔係想搭車，只係乘機搵街坊傾吓偈。」Albert坦言，很多人表示「街坊泥鯭」使人一搭上癮。
Albert駕着已易名為「發現號」的私家車，載過無數大埔「泥鯭」。
「谷友」已開始約消夜團、羽毛球團，團結友愛不言而喻。
群組成立至今短短兩個月，已有超過二萬人加入。
你或者會坐過「泥鯭的」，免費的「泥鯭號」你又坐過未？十月初，面書出現「大埔街坊泥鯭」群組，由一眾車主（又稱「漁夫」）出發前公布行程，讓街坊（又稱「泥鯭」）選擇適合自己的路線加入，過程就像「釣泥鯭」。有別於傳統在路上豎起手指公截順風車，不用食塵，既快捷又方便。群組成立短短兩個月，已超過二萬人入谷（Group），成為「谷友」。
「成日見到啲人等車等到頸都長，但係你同佢講順路車埋佢，佢會耍手兼擰頭，眼尾都唔望吓你。」他苦笑說，香港人很有戒心。雖然經歷了無數次「熱臉貼着冷屁股」，但Albert沒放棄，決心源於一天在路上遇到兩名舉牌截順風車的教院女生經歷。
「我見順路咪車埋佢哋返學校囉！」原來一班學生正進行順風車實驗，啟發他利用網絡平台，推廣順風車文化。
自組遊樂團 建鄰里關係
「原本只係一個功能性構思，想幫大家慳時間，點知會發展到依家咁！」一眾「谷友」已開始約消夜團、羽毛球團，誰想到從不打招呼的街坊，是互聯網令他們熟落。
「平時喺大埔出出入入，見到好多街坊熟口熟面，但始終唔會打招呼。」他指順風車可打破隔膜，「所以好多時大家第一句都係：『嘩！你好熟面口喎』，有相認舊朋友嘅感覺。」Albert坦言順風車讓人重拾久違的街坊情，重新建立鄰里關係。
「今次我車你，可能下次你車我。」Albert因工作關係，經常駕車周圍走，以為自己只會做義載的車主，怎料成為群組第一條「泥鯭」。他憶述當日與太太在尖沙咀看電影後，想徵同行「谷友」夾份坐的士回家，「咁啱又有『谷友』話返大埔，可以順路車埋我哋！咁就成就咗第一個成功配對嘅例子！」Albert更與對方拍下一張「世紀大合照」，意味香港順風車史展開新一頁。
文：簡卓鈞
圖：吳康琦
