終於等到人民幣入咗籃（被納入國際貨幣基金組織特別提款權（SDR）籃子貨幣），不過，美聯儲前主席伯南克喺自己個Blog度話，人仔入籃只不過好似小學雞嗰陣，老師見你「Good Job」，就喺功課簿上獎粒星星畀你咁。即係點？

伯南克

伯南克話，粒星冇實質價值，又唔存得入銀行，只係鼓勵吓繼續努力咁。佢又話SDR用途有限，人仔入籃其實冇為中國帶嚟乜嘢特權。但點解內地咁想入籃呢？佢話中國幾咁渴望被認可做全球經濟大國，所以咁在意呢啲象徵意義。

查實人仔入籃一啲都唔易，人行都做咗好多「功課」，好似放寬存息上限，又調整人仔中間價咁，嚇到市場個心都離一離。搞咗咁耐，國際貨幣基金組織（IMF）呢位老師先滿意，所以呢粒星，得來不易o架！

第一手消息請下載on.cc東網iPhone/iPad/Android/Windows Phone Apps