政壇：富爸媽教仔 三招錢埋身
富爸媽做嘅嘢，同一般人有乜唔同？有三樣：富爸媽會不斷自學、較少懷緬過去、奉行利己。美國有位白手興家嘅富豪西博（Steve Siebold）訪問咗超過一千二百位全球至有錢嘅富豪，得出以上結論，佢仲將研究所得出咗本書《How Rich People Think》。
佢發現富爸媽教仔教女別有一套。想睇吓自己係咪做富爸媽嘅質地？先問心嗰句，有冇講過「錢係萬惡之首」、「知足者，貧亦樂」或「貪字得個貧」先？就係咁，細細個入晒腦，對錢仲點會有好印象！口講想有錢，潛意識就見錢怕怕。
平凡大眾教仔要安穩舒適就夠，話小心錢係萬惡係霸權，咁自然世世代代都只能繼續「貧亦樂」。
富爸媽嗰一套，唔止教咩良好理財習慣，佢哋自細就同仔女講「想有錢好OK」同埋「做人要大膽冇有怕兼要Think Big（有大志睇闊啲）」，仲會教仔女錢係最好嘅朋友，可以幫自己同好多人解決問題兼改善生活。教曉仔女自細正面咁睇錢，錢先會埋仔女身。
