政壇：靚女政助 銷減廢做到殘
話說環境局局長黃錦星去咗法國巴黎參加聯合國氣候峰會，局長政治助理Michelle區詠芷雖無份去，但都唔敢偷懶，不遺餘力咁喺立法會同社交網站Facebook（fb），密密捉人喺手背寫名，再自拍放上網，響應簽署Earth Statement聲明，呼籲各國積極應對氣候變化同承諾會節能減廢。Michelle仲趁尋日立法會大會，四出向議員埋「手」，喺手背寫名立此存照。
區詠芷喺Facebook以殘樣推銷聯合國氣候峰會。（互聯網圖片）
區詠芷喺郭榮鏗手上寫名，代表響應Earth Statement。
Michelle尋日朝喺立法會會議聽外等議員路過，期間就捉住咗法律界議員Dennis郭榮鏗，親自幫Dennis寫名，仲問佢要唔要畫多個心心圖案，又幫佢影埋相添，非常熱心！Michelle上任前喺環保團體工作時，已經係出名嘅靚女，但見佢喺fb嗰張Earth Statement自拍照，就明顯殘咗好多，未知係咪工作太忙碌，冇時間保養？抑或係為咗響應環保，唔再用護膚品同化妝品呢？
