政壇：財金開Talk 識填詞兼整糕
今時今日股評人唔止要刨數刨業績，仲要識埋填詞兼唱歌、仲要識整糕……總之唔只Talk得咁簡單。填得又唱得嗰位係富昌金融研究部總監Stevan譚朗蔚，佢啱啱由一間英國基金公司過檔去富昌一個月左右。Steven舊年已開始搞投資Talk Show，嚟緊搞第七場。
譚朗蔚嘅Talk Show將Hit歌改成財經嘢，仲開咪唱埋。（互聯網圖片）
郭小菱試過開班教整年糕，兼教投資輪證技巧。（資料圖片）
佢啲Talk Show嘅亮點，就係會將啲Hit歌改吓歌詞變成股市財經嘢，仲會自己開咪唱埋，等啲Fans易吸收。好似對上一場Show，佢就將《羅生門》改編成《逃生門》，諷刺七月內地股市大冧。佢啲Talk Show唔係免費嗰隻，一場都有近五百個Fans捧場；睇番佢fb個Fan Page，有成八千幾個Likeo架！
除咗自填自唱外，教整糕一樣得。前輪后Shirley郭小菱就試過喺臨近農曆新年搞整年糕班，邊教整糕邊加插分享投資輪證技巧，好似小班教學咁，仲有互動對談，散戶好難唔印象深刻啦！投資講座要吸引到散戶注意，送嘢唔少得。大抽獎送機票、超市禮券等之外，Shirley話連紀念品都要夠特別，佢哋就試過送「不求人」，象徵佢哋嘅網站數據夠齊，投資者搵輪不求人咁話。
