政壇：象哥「剝牙」照 補鑊冧EQ
本身係立法會、區議會「雙料議員」嘅EQ葛珮帆早前喺區議會選舉落敗，更被所屬政黨建仔嘅黨友「象哥」黃定光寸佢掛住去非洲保護大象，「救到我但救唔到自己」，意指EQ只顧外遊救大象而無時間箍選票。EQ尋日喺立法會支持一個反對買賣象牙貿易嘅示威，仲喺大會提出一項加強打擊走私野生動物嘅動議，被問到象哥對佢嘅批評時，EQ即時黑面，但之後又戲劇性搵象哥幫佢宣傳保護大象。
黃定光（左）拎住幅「剝牙死象」圖，幫葛珮帆宣傳保護大象。（受訪者提供圖片）
世界自然基金會等環保團體尋日喺立會示威，促請政府禁止象牙貿易，又高叫「沒有買賣，就沒有殺害」。問在場嘅EQ點睇象哥對佢嘅批評，點知一提到「象哥」二字，EQ面色一沉話唔會回應，亦唔想再提，然後轉身離開。之後再追問佢同象哥有冇再傾過呢件事，佢就話象哥只係講笑，又話唔希望區選嘅話題延續落去。
但EQ事後就向外發放一幅立法會黨友為佢打氣兼幫手宣傳嘅合照，當中最矚目就係象哥企喺EQ隔籬，象哥仲要拎住一幅大型嘅「剝牙死象」圖片，認真大吉利是，莫非係補鑊之作？
