政壇：搞搞政：鄉事撩泛民 區會倒建仔
每逢選舉，鄉事派都要幫建制派「抬轎」，特別係對建仔最有微言，底因係建仔多年嚟鮮有喺新界傳統權益問題上據理力爭，故鄉事派同建仔一直暗戰連場，而新一屆區議會嘅正副主席選舉，據聞鄉事派仲有意同泛民聯手推舉鄉事派代言人，鄉事派同建仔嘅惡鬥一觸即發。
消息指鄉事派最少喺三區區議會，包括元朗、北區同大埔同建仔開戰，其中元朗區嘅戰況最緊湊。據知鄉事派眾人以梁福元為首，有意拉攏泛民、個別建制派連成一線，至今已掌握十三、四張鐵票，正爭取手握三票嘅新民黨，同埋多名有鄉事背景嘅議員力撐，希望拎到過半數支持票推舉喺區選自動當選嘅律師沈豪傑上陣，挑戰角逐連任主席嘅建仔梁志祥。有熟悉情況人士分析，新民黨關鍵三票嘅取向效果迥異，將影響該黨代表任區議會副主席嘅機會率；若投棄權票唔得失任何一方，又可能變成兩面不是人，故極考該黨嘅政治智慧。
其實鄉事派喺北區區會都蠢蠢欲動，有傳建仔劉國勳「升呢」區議會副主席之路有暗湧，事關以上水鄉事委員會主席侯志強為首嘅北區鄉事派，一旦聯同泛民同獨立建制派議員支持，有機會取得過半數支持重奪副主席之位。
鄉事派同泛民聯手嘅情況或喺大埔區會再現，今次係泛民疑攪局拉攏鄉事派支持，目標係踢走建仔黃碧嬌，改由溫和鄉事派任區議會副主席。但分析指要「闖關」成功，最大阻力係身兼鄉議局副主席嘅建仔張學明，佢喺大埔鄉事派有決定性嘅影響力，因此大埔反建仔正副主席一役難度甚高。
