政壇：楊偉雄立會初戰受靶

其中社民連「長毛」梁國雄一度要求點算法定人數，差十幾秒險釀流會；其後又「考起」楊偉雄，問佢有冇考慮用迪士尼樂園隔籬一幅六十公頃嘅土地做數據中心，但楊回應話唔夠資料作答，長毛就話自己出任局長仲適合。白鴿黨劉慧卿就質疑由楊偉雄擔任顧問嘅創新及科技諮詢委員會代表性不足，會唔會考慮重組委員會，增加代表性。楊回應話聽取意見不限於委員會，之前曾花時間同多個業界組織見面。卿姐再追問佢會否重組委員會，佢先至話暫時唔會有大重組。

法律政策專員口窒

不過，資訊科技界議員莫乃光認為楊偉雄首次到立法會，表現算不過不失，其他議員亦算對佢客氣，又建議楊作答時精簡啲。

此外，大會其中一條口頭質詢係關於性罪行法例，由於律政司司長袁國強因病缺席，改由法律政策專員上陣，可惜出師不利，一開始就畀長毛質疑身份：「坐喺度嘅官員係咩人」，面對其他議員質詢亦「口窒窒」，有議員仲直斥當局「搵個唔識答嘅人嚟」。卿姐就話唔同團體早喺十幾年前，已開始投訴性罪行案件嘅調查同審訊過程令受害人難堪，質疑當局係咪「借咗聾耳陳隻耳」，又不滿點解今年三月先開始向學警同見習督察提供相關訓練。法律政策專員回答時引用保安局一三年嘅數據，卿姐先後兩次指當局派唔適當嘅人嚟回答，又促請主席曾鈺成跟進。

人力嘅陳志全追問法改會幾時開展同結束諮詢。未知法律政策專員係咪畀議員嚇倒，回答時「口窒窒」兼連番出錯，仲要同事從旁協助搵資料。值得留意嘅係立法會網頁冇顯示專員姓名，會上亦冇人知佢姓甚名誰，直至政府新聞處出稿，先知佢係資深大律師黃惠沖，真係得啖笑。