香港究竟有幾多天橋？唔講唔知，總共有一千三百幾條行車天橋，而行人天橋及行人隧道亦接近一千二百條，咁細嘅地方居然有咁多天橋，睇怕都係一項世界紀錄咯。

即係咁，香港地少人多，交通繁忙，天橋特別多本來好正常，問題係，如果天橋保養維修不足，咁就大鑊喇，好似一個個計時炸彈咁，隨時禍從天降都似。呢，早前屯門公路深井段有大塊石屎剝落，直墮橋底兒童遊樂場，好彩當時人流唔多，冇造成傷亡，但一次冇事，唔表示次次冇事，萬一再發生石屎剝落，會唔會仲係咁好彩？當局有冇危機意識？有冇加強天橋保養維修呢？

唔係杞人憂天o架，本報記者早前偕同專業檢測人士巡查多條天橋，結果發現唔少問題，唔係石屎剝落，就係有滲水現象。其中以俗稱「鵝頸橋」嘅灣仔堅拿道天橋問題最嚴重，橋底多處出現水漬，部分位置有裂縫，除咗成塊石屎拱起，喺巴士站對上嘅橋底位置更有一塊長逾半呎嘅石屎鬆脫，睇見都牙煙。

嗱，專家以紅外線儀器掃描，發現橋底最少有三處屬於異常低溫帶，即係話石屎內出現滲水情況，如果情況持續，鋼筋可能生銹膨脹，逼爆石屎。係人都知，鵝頸橋一帶有多個巴士站，亦有幾個「打小人」攤檔，人流稠密，萬一石屎剝落，後果不堪設想。

仲有，東區走廊橋身同樣存在滲水情況，隨時出現石屎剝落。對於呢啲危機，當局又知唔知呢？路政署聲稱一直按既定安排檢查轄下嘅橋樑構築物，包括六個月一次嘅定期檢查及兩年一次嘅綜合檢查，若發現問題會即時跟進喎。

講就輕鬆嘞，可惜事實啱啱相反，本報記者隨機巡查幾條天橋已發現咁多問題，證明路政署嘅所謂定期檢查及綜合檢查幾咁兒戲。正如專家話齋，多條天橋出現滲水，情況絕不理想，只要路政署認真檢查，特別係落雨之後，好易發現問題，偏偏當局求求其其，次次都要等到出事至補鑊。

冇計喇，港產官僚一向後知後覺，唔踢唔郁。正所謂，千里之堤，潰於蟻穴，好多災難都係疏忽引起，隨着天橋愈來愈多，梗有一個炸彈喺左近，當局繼續懶懶閒，唔通真係要見到棺材至流淚？叮！