城中鏡：老公驚喜贈鈪 蔣怡冧晒
藝人Coco蔣怡尋日佩戴過百萬鑽飾出席珠寶設計師老公Dickson翁狄森品牌十五周年活動，同樣係佢哋相愛十五周年。現場Coco獲老公驚喜送上鑽石戒指同手鈪，手鈪設計寓意為如意鎖，係○五年作品，希望將美好嘅回憶鎖住。問到有冇送珠寶鑽飾畀囡囡？Coco話：「冇，所有嘢都畀晒我。」Dickson指自己寵壞Coco，而Coco就寵壞囡囡，笑言係個健康嘅循環。對於照顧囡囡，係咪一個擔任衰人，另一個擔任好人？Coco話：「教育通常一齊，但我對得囡囡最多，所以通常我係惡嗰個。」
蔣怡獲老公送上鑽石戒指同手鈪，驚喜萬分。
至於有冇設計畀囡囡做嫁妝？Dickson盡顯慈父咁話：「全部畀晒佢，佢鍾意揀邊樣就邊樣。」在旁嘅Coco就呷囡囡醋：「又話全部畀晒我！」二人打情罵俏，認真恩愛。Coco透露囡囡遺傳爸爸設計同媽媽烹調天分：「將來一定叻過我哋，唔使留珠寶畀佢。」
至於點樣慶祝十五周年？Dickson話未坐過郵輪，同時又想去非洲，Coco希望等到囡囡識得自行如廁後先帶同旅行。咁會唔會製造愛情結晶品慶祝十五周年？Dickson話旅行期間會嘗試造人，不過依家忙住搬屋，所以農曆新年先可以出發。問到搬遷大屋係咪意味增添多間BB房？Coco坦言有再造人嘅打算。
