立法會尋日辯論由議員陳克勤提出嘅「發展經濟，改善民生」議案，喺分組點票下被否決都係意料中事，但估唔到連建制派議員發言反而狠批克勤。工聯會「阿王」王國興批評，克勤為通過動議迴避反對派要推倒政府呢個焦點；工業界林大輝亦斥克勤想法天真，話政治同經濟民生息息相關。

阿王話克勤無揭露真正矛盾所在，認為真正矛盾係立法會反對派要推倒政府，批評克勤為咗令議案通過，迴避咗呢個焦點，點名批評「陳議員，你點可以唔提呢個問題呢？」鬧完之後就轉身離開會議廳。大輝就直斥克勤自欺欺人，又話佢天真、理想化、不切實際，根本就係同現實脫節，仲話一個地方有人就有政治。

議案最後未能得到直選議員支持而被否決，關鍵係十二票贊成對十三票反對，如果阿王無憤而離席，議案好大機會可以通過。今次教訓克勤，下次提議案前要同建制議員多啲溝通，否則臨門一腳先甩轆就唔抵喇！

第一手消息請下載on.cc東網iPhone/iPad/Android/Windows Phone Apps